Puisi-Puisi Karya: Kalfein "Kale" Wuisan*

MINAHASAN TETENGKOREN

I

Skarang bukang lei jaman

Torang mo tutu mata

Tutu mulu rapat-rapat

Dudu badiang

Babahaga

Matikutu

Skarang bukang lei jaman

Torang maruku pa dorang pe kaki

Kong jilat-jilat cepatu

Baminta kaadilan

Skarang bukang lei jaman

Tong rupa sapi cucu idong

Taiko-iko

Dorang ja bilang

Skarang badiri sama tinggi

Pigi kase bobale

Dorang pa dong pe kursi

Biar dorang tau

Arti REVOLUSI

I YAYAT U SANTI

MINAHASAN TETENGKOREN

II

Orang bilang tong kaya

Hasil kobong deng tambang

Tabuang buang

Mar,

Co’ lia skarang

Beras so nae gila gila

Kurang kopra lebe mura

Mar salah-salah mo makan kopra to’

Torang manusia bukang anjing

Napa lei,

Harga 1kilo gula so = 1 kilo besi tua

Kurang paser lebe mura

Mar nda mungkin to

Kopi par deng paser

Biarlei dia kopi torabika

Tatap depe par gula

Apalei, co’ cek di pasar

Bawang rica tomat pe harga

Lawang-lawang harga baju

Mar itu bukang patani pe salah

kong itu barito nae

Torang orang minahasa

Makanan musti pedis

Mar,

Mokase pedis bagimana

Kalo rica deng depe tamang

So harga 1 par baju?

Tong orang pang bagaya

Lebe beli baju dari beli barito

Torang lei so musti sadar

Minyak tana musti mura

Inga kasiang kalo ujang

Kayu api basah samua

Nda mungkin to momasa

Bakar pintu rumah??

Inga kasiang tu orang

Yang nda ja pake kayu api

Mo momasa pake apa dorang?

Kalo sto kwa

Itu kongfor bole isi aer kincing

Biar minya’ tana mahal

Nda pangaruh

Mar kasiang

Tong pe kincing ndak ja manyala

Ini kwa lantaran dorang

Talalu pande mo ator tong pe hasil bumi

So itu

Mar jo tong angka plungku

Pigi ka kantor dewan

Rame rame jang sandiri sandiri

Tong tuntut tong pe hak

Kalo dong balamu

Suruh turung dorang samua

Biar pemilu ulang

MINAHASAN TETENGKOREN

III

Oras cingkeh

Depe wer ndak baku maso

Cingkeh so mera rupa rica blum pete

Lantaran ujang sapu trus

Patani cingkeh bilang

“Lebe bae bongkolu di pohong

Daripada busu di rumah”

Mar katu

Dorang tatap barsyukur

Riqi tiap hari minggu

5kg per kk sumbang di gereja

Sampe-sampe pendeta

Yang nda ada pohong cingkeh

1 karong dong pe cingkeh

Di kamar belakang

Jemaat ada kase

Memang  di muka dong barsyukur

Mar di hati momake

”So musim ujang le kasiang,

ni harga cingkeh le bekeng saki kapala”

Tambah lei kasiang tong pe pamarenta

Dari jaman ATO sampe SBY

Nda ja taru kira

Tu barang ni dia

”Lebe bae gusdur Cingkeh riki 90 ribu,

Cuma dia katu yang babagus”

Dong bilang ba gitu

Mar mo bekeng bagimana

Somo kaluar taripang

Patani cingkeh babataria

Mar pamarenta so

Nda ja parduli

Piii....

Bagitu kata tu wakil rakyat

Cuma Duduk Diam Dapa Doi

Tong disini babataria

Dong disana pake headset nokia N93

So rupa tre kwa

Toko hp tu pinggang

Riki 2 biji hape tagantong di ban

 Bagimana katu

Torang pe hakDorang korupsi

Caparuni...!

Makanya skarang

Jang tako-tako

Angka lilang tinggi-tingi

Kong suruh turung dorang

Yang ndak butul ja karja

Mar jaga jang sampe anarkhi

Inga torang orang beriman

*Penyair, Peteater Sulut, Ketua CTC KPR KGPM, Pegiat Mawale Movement.